Dipangido Debata naeng badia ngolum

Dipangido Debata naeng badia ngolum
1 TESALONIK 4:1-12

Ia buku 1 Tesalonika on dibagi do tu lima bindu, jala ganup bindu sai ditaringoti do paboa naeng ro ma Tuhan i. Sian ayat i boi botoonta paboa haroro ni Tuhan i tung mansai tangkas diondolhon di bagasan buku on. Bindu parjolo paingothon asa adong hamubaon ni roha ni halak kristen na di Tessalonik. Bindu paduahon, paingothon nasida, asa ndada holan marhamubaon, alai dohot pararat barita na uli . Bindu patoluhon, manaringoti parmahanion ni si Paulus di angka namarhaporseaon tu Jesus. Bindu paopathon taringot tu panatapan tu jolo i ma partingkian nanaeng ro i. Impolana i ma asa mangolu di bagasan parange hakristenon. Na dua bindu parpudi mangajarhon taringot tu ngolu na sintong. Jala turpukta on i ma manaringoti taringot tu parulaon domu tu panjouon siihuthon Kristus.

Parange, parulaon, ruhutruhur dohot angka rumang ni angka harohaon/ parrohaon sudena i ingkon masirainrainan di bagasan ngolu ni hajolmaon. Boasa porlu i ? Ala saihot do i di ngolu ni angka na porsea. Roha parbagasan i ma na mamereng angka na ummuli, na dumenggan, dohot na sumintong. Songon i ma si Paulus paingothon halak Tesalonik asa mangolu marhite na marparulan songon halak Kristen di bagasan ngolu parsaripeonna. Ala badia do parsaripeon i jala ndang mangihut tu hagiot ni daging na so tumanda Debata. Tatulak do pandapot ni si Demosthenes na mandok songon on: “Kita memelihara para pelacur demi kenikmatan, kita memelihara selir untuk kebutuhan tubuh sehari-hari, kita memelihara isteri untuk mendapatkan anak dan menjadi penjaga rumah kita yang setia”. Saleleng sahalak baoa marmuduhon pardihutana dohot angka ianakkonna, ndang tagamon adong siinsahan di ibana, manang songon dia pe pangalahona di duru ni parsaripeon i. Lapatanna, ndang ruhut na mangotapi hagiothagiot ni sadasada jolma. Horong ni angka baoa dohot angka parompuan ndang marharoroan sian hajolmaon i, ninna Apostel Paulus.

Hamu angka dongan sahuria ni Tuhanta, songon dia do pingkiranta memereng ragam ni angka parsoalan na mambahen menek jala metmet ruhutruhut ni pardonganon ni baoa dohot boru, tarlumobi di angka na umposo. Dipaingot Apostel Paulus do asa manjamothon habadiaon marhite na mambahen denggan parsaoran ni baoa dohot boru, asa sai gabe mardongan haporseaon na tangkas. Di buku Rom 12:2 didok: “alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata”. Angka halak naung pinaimbaru ni Debata, dijou do ibana sian hagolapon asa mangolu di bagasan hatiuron huhut gabe siboan hatiuron muse di angka na humaliang ibana. Panjouon i tung mansai arga situtu do. Alani unang pinansuasaehon. Didok angka na pistar: “Kesempatan hanya datang satu kali saja”. Alani i ulahon hamu ma na boi ulahononmuna mangoloi panjuon ni Tuhan i laho pasangaphon Debata. Pangalaho na denggan, i ma pangalaho na pasidingkon harohaon na so turut dohot na so gabeak. Pangalaho i, martudutudu tu harohaon, parulan, pambahenan na boi nalnal idaon. Na niigil sian angka na porsea i ma, naeng mangolu di bagasan pangalaho na denggan maradophon dongan dohot di adopan ni Debata. Alani i ingkon pasidingon ni jolma do parange na maralo tu lomo ni roha ni Debata. Ulahon hamu ma na denggan hombar tu lomo ni roha ni Debata. Ai i do sihangoluhonon ni angka na porsea, asa ndang sae holan na mangkatahon alai ingkon dipatuduhon marhite parulan na tangkas. Marhite pangalaho i tarida ma hatiuron sinondangan ni Debata. Nalnal jala marpangkorhon di na humaliang hita, ala rade hita marparulan hombar tu lomo ni roha ni Debata. Halak na tarjou ingkon tangkas do ibana siulahon hata ni Debata, pasidingkon pangalaho na boi mambahen hita tartait tu angka ulaon na hinagigihon ni Debata.

5. Bahan Diskusi.
- Angka dia ma ulaon na boi paholang dirim sian holong ni roha ni Debata?
- Domu tu godang ni VCD porno na adong ni tongatonga ni masyarakat, boha do bahenonmu paholang diri sian i?
- Songon Naposobulung di HKBP, songon dia ma pandapotmu taringot tu pandohan: “gabe imbaru ma hamu dung muba pingkiranmuna”.

Pasiding hamu ma hajahaton
(MARKUS 14:43-53)

Boi do jumpang hita hape angka sisean na so satia tu guruna. Hape ia guruna i sai diajarhon do sian nasa rohana holong, hasatiaon dohot pangajaran na dumenggan tu angka siseanna. Tujuanna asa marparbue pangajarion i di pudian ni ari. Alai adong do sian angka sisean i na laos mangoloi pingkiranna sandiri. Marusaha laho paluahon diri jala mangalo sahat tu na manjehehon guruna i. Hape pangkorhonna ingkon jaloonna dipudian ni ari. Pangalaho sisongon i ma na binahen ni sahalak sisean ni Jesus na margoar Judas Iskariot. Marhite na hohom ibana manjehehon dohot marsangkap na roa laho pasahathon Jesus tu angka Malim, sibotosurat, parise, marhite na manjalo tuhor (imbalan) 30 hupang, jala mangaturhon tanda taringot tu Jesus i. “Ia i na huumma i ma Ibana”.

Ala nunga golap parnidaan ni si Judas Iskariot, jala mansai lomo rohana naeng marnampunahon hepeng na godang, dohot digohi pangantusion paboa Jesus margogo laho paluahon dirina sian sangkap nasida i. Marhite pingkiran i ma barani si Judas laho manjehehon Jesus guruna i. Sangkap ni si Judas Iskariot dijalo angka sintua ni malim di bagasan las ni roha, ala nunga tung mansai leleng disangkapi rohanasida laho manangkup Jesus. Alani i ma mansai hatop nasida mangalehon hepeng tu si Judas, domu tu las ni roha nasida i. Alai sude sangkap na roa na adong di bagasan roha ni si Judas Iskariot nunga diboto Jesus hian. Alai ndang diorai Jesus si Judas laho mangulahon i ala naeng jumpang do hata ni surat i na mandok: “Ingkon pasahatonna do Anak ni jolma tu tangan ni parjahat, laho manalesei utang dosa ni hajolmaon”.

Di tingki laho Jesus tu porlak Getsemane dohot angka siseanna, laos di tingki ima ro si Judas rap dohot torop halak na marpodang jala marlombutlombut laho manangkup Ibana. Pintor diumma si Judus Iskariot ma Jesus, songon tanda tu angka malim, huhut mandok: “Tabe di ho Guru”. Dungi di tangkup angka solidalu i ma Jesus, so mardongan biar dohot lomos ni roha. Alai Jesus ndang mabiar mangadopi na masa i, jala didok ai na dirimpu hamu do Ahu panamun, pola marlombutlombut hamu huhut marpodang laho manangkup Ahu ?. Hape na sai laonna tongtong do Ibana mangajari ganup ari di bagas joro, alai ndang ditangkup nasida Ibana. Hape marhite panjehehonon ni si Judas Iskariot i, lam barani ma nasida manangkup Jesus di bagasan pangaradeon ni diri na tangkas. Mamereng na masai mabiar ma angka sisean i huhut laho be paluahon dirina. Alai hombar tu na tarsurat di Mateus 26: 51-52, sada sian angka dongan ni Jesus mangalaluhon tanganna, disintak ma podangna, ditampulhon ma tu na poso ni sintua ni malim salahak, dipisik ma pinggolna, alai didok Jesus ma tu ibana, pasarung podangmi ! Laos dipasuang Jesus ma pinggol ni na poso nangkin, gebe sumuang songon na sai laon. Di bagasan pangalaho na songon i, ndang tarrimas Jesus nang pe naung dijehehon Ibana. Laos di tingki sisongon i boi do Ibana patuduhon asi ni rohana marhite na mangubati pinggol ni naposo na tinampul nangkin, jala ndang olo Ibana lari manang na lintun, martabuni maradophon na torop i. Satorusna diboan nasida ma Jesus tu jolo ni pamarenta marhite na manuhashon paboa sialo Kaiser Romawi Ibana. Dungi dituhashon ma dohot ragam ni hata tu Ibana; marhara angka situan na torop Ibana asa unang digarar beo tu negara. Sude angka na tinuhashon nasida i, holan pasombu tagas nasida do i. Alai laho pasauthon hata na tarsurat i do sude.

5. Sipahusorhusoron

Sude halak na mangulahon hatigoran ndang mabiar ibana tung manang aha pe na masa. Jala torus do i mangkatahon hasintongan nang pe ingkon mangadopi ancaman, hamaolon, manang hamatean pe. On ma na niulahon ni Jesus saleleng diajarhon Ibana angka hasintongan i tu siseanna dohot tu situan na torop. Marhite i ma di pudian ni ari lam tarida angka parbue ni hasintongan i gabe pola siingoton ni angka na mangkaporsea i Ibana. Alai balik do tu angka parjehe na so mangargahon pangajarion na jinalona, ingkon sipasidingon ibana sian parsaoran siganup ari songon tudos niulahon ni si Judas Iskariot. Ingkon sihasogohonon ibana sahat tu ajal ni ngoluna. Ditangkup nasida Jesus ndada ala ni pangalohoNa na so denggan. Alai naeng rade do Ibana maneahon hosaNa manjalo angka hata natinuhashon ni angka na torop, laho manobus jala paluahon jolma pardosa, alani i sude jolma angka namangihuthon pangajarionNa gabe taruli gogo dohot las ni roha nang pasupasu di ngoluna siganup ari. Ala ni i paloas ma ngolum songon Jesus na rade mangkatindangkon hasintongan jala so mabiar mangadopi ragam ni angka na masa gabe pasupasu ho tu na humaliang.

Hamu angka naposo bulung parhaseang hamu ma tingki haposoonmu tu angka ulaon na denggan. Naeng rade marpanindangion laho pataridahon hasintongan di sandok ngolu di tingki na une nang na so une, gabe goaron ma hamu angka anak ni Debata. Pasiding hamu ma ngolu dohot parange na olo majehehon dongan, alai mangolu ma hamu di ngolu na gok tanggung jawab tu Debata dohot tu dongan jolma di bagasan ulaon dohot ngolu siganup ari.

6. Bahan diskusi.
a. Aha do na mangonjar roha ni jolma umbahen olo manjehehon? Alusi ma jolo dohot denggan!.
b. Laho mangkaholongi dongan ingkon pataridahonon do marhite parulan dohot panghophopon, ndang sae holan na mandok. Dok ma jolo angka dia ma pangalaho sisongon i naung hea diula ho maradophon dongan.
c. Angka dia ma na mangonjar roha ni jolma na boi mangotapi sangkap panjehehonon i ? Patorang ma jolo dohot denggan!. Ayat emas Johanes 13:15 “Ai sitiruon do hubahen tu hamu, asa dibahen hamu songon naung hubahen I tu hamu”.