Jamita di Advent I, Minggu 2 Desember 2012 Jeremia 33:14-16 JAHOWA DO PARPINTORANTA 1. “Togu urat ni bulu toguan do urat ni padang, togu nidok ni uhum toguan do nidok ni padan”, ido sada pandohan di halak Batak paingothon hinaarga ni padan manang bagabaga (janji) nabinahen ni jolma (halak Batak). Digombarhon i do parsitutuon marningot aha naung niundukhon marhite hata manang pambahenan maradophon halak namarpadan dohot diriniba. Asa unang lupa jala tongtong ingot di angka naung hinataan hian. Atik pe ndang tarsurat di harotas manang buku panuratan alai anggo di roha nang pingkiran tarsurat do i. Asa tu angka tingki na mangihut adong andor sipaihutihuton ni sundut naumposo hombar tu parpadanan i. Nang pe di tingki naparpudi on ndang apala sai dihangoluhon be pandohan i, nunga adong sipata namangalaosi padan naung binahenna di manang piga pangalaho, atehe. Molo tataringoti padan ni jolma umarga sian pandohan ni halak Batak i do padan ni Debata naung tajalo marhitehite hinasintong ni hataNa naung sahat tu hita di tingki on. Lapatanna nang pe togu padan nabinahen ni jolma alai tumoguan dope anggo padan ni Debata tu hita angka naung hinophopna (huriana). Ima na ingkon tongtong suan di rohanta huhut paingothon hita di hinarga ni panjouon dohot pamilliton ni Debata gabe bangsoNa. Naung tarsurat do i di Buku na badia i naso boi sosaon ni manang ise pe. Porsea do ho disi? 2. Namangolu do hita di bagasan padan (bagabaga) nabinahen ni Debata. Padan ni Debata ndada songon nabinahen ni jolma alai padan nabinahen ni Debata sandiri maradophon hita jolma. Ia padan ni Debata ima padan asi ni roha salelenglelengna. Padan holong ni roha na manongtong jala nasintong marparbue. Padan songon naung niuarihonna tu si Abraham, Ishak dohot Jakob sahat tu halak Israel nang tu hita nuaeng. Didok hata ni Tuhanta di Yesaya 54:10 “Ai munsat pe angka dolok, jala humuntal angka robean, alai anggo asiasingku na so tupa munsat sian ho, jala padan ni hadameongku na so tupa humordit, ninna Jahowa siasii ho”. Laos i do nanidok ni Jesus di Lukas 21:33 (patudos tu turpuk Epistel): “Salpu pe sogot langit dohot tano on, anggo hatangki na so tupa salpu”. Parbue ni padan i nunga tajalo jala tahangoluhon di pardalanan ni ngolunta on. Asa ganup halak Kristen ingkon do marhatopothon parbue ni padan naung binahen ni Debata. Songon dia ma rumang ni i? Molo boi pe hita hipas sahat tu tingki on ingkon parhatopotonta do i parbue ni padan ni Debata. Molo boi pe hita di tingkion mangula angka ulaon nanilehon ni Tuhan i parhatopotonta ma i parbue ni padan ni Debata. Dohot angka na asing na so boi tabilangi. Sandok malo ma hita manghilalahon huhut manghamauliatehon bagabaga ni Debata naung sahat tu hita. Alai naumarga sian i sude, padan ni Debata tu hita ima naung nilehonna AnakNa Tuhan Jesus Kristus manobus hita sian parhatobanan ni musu nang sian rante ni sibolis. Gabe ndang hamatean salelenglelengna jambar ni ngolunta, alai hangoluan na manongtong. Ido jambar ni angka naporsea di Jesus Kristus hombar tu pandok ni Debata (Joh 3:16). Hinorhon ni hamamate dohot haheheon ni Jesus Kristus i lam arga ma hita di adopan ni Debata. Ndada holan di portibion alai tarlumobi di banua ginjang di inganan napinarade ni Kristus uju manaek ibana tu banua ginjang. Laos ido bagabaga ni Debata sitioponta di ngoluon. Ndang di portibion anggo sambulo ni tondita alai di banua ginjang i do. Ido nahinatindanghon ni apastel Paulus di 1 Kor 15:19 na mandok: “Anggo holan di tano on hita mangkirim di Kristus i, jolma na dumangol do hita sian saluhut” 3. Asa ganup ruas ni huria marhatopothon na tongtong do Debata satia di padan dohot di bagabagana naung nidokna tu hita. Dia bagabaga ni Tuhan i tu hita? Onma bagabaga i: “Di angka ari dohot di tingki i Ahu ma patubuhon di si David sada tumbur hatigoran, Ibana ma manghajongjonghon uhum dohot hatigoran di tano on. Di angka ari i ma dapotan tua Juda marsonangsonang isi ni Jerusalem maringanan, jala on do goarna dohonon ni halak :Jahowa parpintoranta”(Jeremia 33:15-16). Tangkas do ditodo jala dipillit Debata bangso Israel gabe bangso nahinaholonganna. Bangso napinillitna jala punjung sian torop bangso di tano on. Marpadan do Debata tu bangso i na ingkon dapotan pasupasu nasida. Dapotan susu dohot situak ni loba di tano Kanaan nabinagabagahonna i. Atik pe ingkon mangadopi ragam ni angka namasa marhitehite naingkon tarbuangnasida di sada hatiha. Alai di sada ombas na tinontuhon ni Tuhan i malua do nasida muse. Ido umbahen didok di Jesaya 54:7 “Satangkirisap lelengna hutadingkon ho alai papungupunguongku do ho muse marhitehite angka asi ni roha godang” Di pardalanan ni bangso i tangkas do dipatuduhon Debata holong dohot asi ni rohana tu nasida. Uju mardalan di tingki arian dipatuduhon ombun, uju mardalan tingki borngin dipatuduhon tiang api. Ndada holan i, alai disarihon naringkot di nasida marhite sipanganon (manna) sian banua ginjang dohot lote (2 Musa 13:22). 4. Di minggunta sadarion nunga sahat hita tu minggu advent na parjolo. Opat hali hita maradvent andorang so tapestahon pesta parningotan hatutubu ni Tuhan Jesus (Natal). Ganup Advent paingothon hita di haradeonta manomunomu haroro ni Kristus i. Advent lapatanna mangarade diri manang manomunomu di haroro ni Sipalua i. Huhut mangarade diri laho mamestahon ari parningotan di hatutubu ni Tuhan Jesus Kristus. Atik pe di minggu-minggu advent on nunga adong naung patupahon pesta Natal. Alai sada na ringkot botoonta laho patupahon Pesta i ima tau hasangapon jala pujipujian di goar ni Debata Ama Anak dohot Tondi Porbadia nasa pesta natapatupa. Unang holan di hariburon sambing alai sintong ma marpesta Natal. Alani i di minggu adven parjolo on naeng ma taparade rohanta manomunomu haroro ni Sipalua i dibagasan haserepon dohot las ni roha. Aha do tandana hita manomunomu Sipalua i? Ima marhitehite roha dohot pingkiran na ias dohot nahipas. Somalna molo jumpang Advent dohot pesta Natal tontu tamba ma na sipingkiran laho manarihon angka naringkot tu pesta las ni roha i. Pahean ni angka ianakhon, sipatu naimbaru, gugu (uang Natal), binda dohot angka biaya na mardomu tu natal. Asing ni gogo dohot tingki sipasahatonta tu ulaon pesta i isarani latihan dohot marrapot. Alai saluhutna i taetong ma bahagian ni peleanta tu Debata. Alani unang ma holan di pangaradeon parduru sambing natarida alai ingkon dohot ma nang di partondion. Ingkon las rohanta mamestahon hatutubu ni Jesus i jala ingkon tamba haporseaonta. Unang dung salpu pesta Natal gabe tubu parbadaan dohot parsalisian tu angka dongan. Naeng marbadai panitia ala hurang hepeng manutupi pengeluaran? Dao ma angka pangalaho sisongon i atehe. Alai naeng ma tangkas tarida parbue ni advent dohot Natal di hita di jolo ni Debata nang di jolo ni jolma. Jumpang dame dohot las ni roha di angka nasapunguan. Masihaholongan ma unang masihosoman. Barani manalpuhon hasalaan ni dongan jala laos barani manopoti hasalaan nabinahen tu halak na asing. 5. Antong taingot ma namangolu do hita di bagasan padan dohot bagabaga ni Debata. Padan i do jaminan di ngolunta asa unang hita mabiar mangadopi angka hamaolon na masa di ngolu on. Rade do Debata mandongani hita nang di tingki sitaonon, manang di tingki hasusaan nang di tingki las ni roha. Sandok tapangido ma gogo sian Debata asa diurupi hita ganup marsadasada. Diurupi laho mangula angka siulaonta siganup ari. Asa sude nataula i manghorhon las ni roha jala tau pujipujian di Debata. Molo tahaporseai do padan ni Debata di bagasan ngolunta on tontu ingkon pagomgomhononta ma sandok ngolunta tu ibana. Unang be hita lalap holan mangalului arta portibion atik pe ringkot do i. Alai na umarga sian i ima harajaon ni Debata na manongtong i (Mat 6:33). Talehon ma nasa roha dohot gogonta nang pingkiranta laho manghaporseai Debata parholong roha i (5 Musa 6:4-9). Jahowa do parpintoranta, ima sada panindangion ni haporseaonta tu joloan on. Panindangion sisongon i mangapuli hita ganup atik pe sipata ingkon tabolus angka na maol. Alai marhitehite namanghatindanghon Jahowa parpintoranta dipatuduhon i do parsitutuon ni haporseaon laho mangadopi ragam ni na masa di hita. Tarpatupa Debata do saluhut natapangido asal tongtong hita mangolu di bagasan unduk dohot lomo ni roha ni Debata. Amen.

Baca Selengkapnya.....