Penulis : Pdt. Pahala J. Simanjuntak, MTh
Tama do hita mandok mauliate tu adopan ni Debata ala ni asi dohot holong ni rohaNa patulushon angka ulaon di tongatonga ni huriaNa.
Na di ari 30 Nopember - 2 Desember 2008 dipatupa Hurianta HKBP Distrik II Silindung do Sinode Distrik maringanan di Gedung Sekolah Minggu HKBP Pearaja niuluhon ni Pdt. S. Manogari Silitonga, MTh, Praeses HKBP Distrik II Silindung. Nidohotan ni ganup utusan sian ressort dohot utusan ni lembaga Pendidikan Teologi ima Sikola Pandita dohot Sekolah Guru Huria Seminarium Sipoholon hombar tu Aturan dohot Paraturan HKBP.
On ma Sinode Distrik na parjolo napinatupa ni Distrik II Silindung dunghonsa Sinode Godang HKBP Periode 2008-2012 sinondangan ni Tema: “Ringkoti hamu huhut hasonangan ni huta habuanganmu na hubaheni, jala tangiangkon hamu nasida tu Jahowa, ai molo marhasonangan ma dohot hamu” (Jer 29:7).
Nunga tabolus be taon Koinonia dohot taon Marturia na di taon na salpu i, jala taon 2009 nunga ditotophon hurianta be gabe taon Diakonia HKBP na mangondolhon ringkot ni panghobasion.
Marhite Tema ni Sinode Distrik II Silindung on, tarjou do huria asa marsitutu laho pahinsathon ngolu na masitangiangan dohot masiurupan songon parbue ni ngolu ni angka na porsea di Tuhanta i. Dihatai do nang angka na marpardomuan tu panghobasion asa marhasonangan di bagasan taon 2009 ima laho pahinsathon ngolu partondion ni sude ruas ni hurianta lumobi ma i na mardomu tu panogunoguon tu dakdanak sikola minggu, remaja dohot naposobulung. Laos ditaringoti do di Sinode Distrik i parsitutuon ni ganup regional laho padasiphon angka parsaoran dohot patoguhon hasadaon ni huria. Angkup ni i ditaringoti do di Sinode Distrik sangkap laho mambangun rumah dinas ni Praeses di Distrik on.
Tatangianghon ma asa anggiat mardalan sude program panghobasion ni hurianta HKBP suang songon i nang di HKBP Distrik II Silindung di taon Diakonia 2009 on, huhut manomunomu Pesta Jubileum 150 taon HKBP di taon 2011.
Sai dipasupasu Tuhanta ma saluhut hurianta laho manalpuhon taon 2008 on, jala ditogutogu ma hita mamongoti taon 2009 on.
Dipaujung do Sinode Distrik on marhite Ibadah panutup dohot Ulaon na Nabadia na hinobasan ni Pdt. S. Manogari Silitonga, MTh, Pdt. Lucius T.B. Pasaribu, STh dohot Pdt. Pahala J. Simanjuntak, MTh. Hata ni Debata na gabe jamita dienet sian Jesaya 60:1 ”Hehe ma ho marsinondang ma ho ai naro panondangmu jala hamuliaon ni Jahowa binsar di atasmu”
Laos marhite on parsinode pasahathon Selamat Advent tu sude ruas ni huria.
Tidak ada komentar:
Posting Komentar