PHD

PHD Naposobulung:
Rom 8:12-17
Mangolu di bagasan Tondi ni Tuhan i
1. Patujolo
Ia turpuk PHD di hita di tingki on ima sabagian sian poda ni apostel Paulus tu huria Rom asa tangkas nasida marpangalaho di bagasan Tondi ni Debata. Suang songon I ma nang hita angka naposobulung ni huria (NHKBP), ingkon tangkas ma hita marpangalaho hombar tu pangajarion ni Tondi i. Antong taputihi ma mutiha na arga sian turpuk on.
2. Mutiha siputihan:
a. Jotjot do jumpang di harohaon ni jolma (khusus naposobulung/Remaja), nang pe maralo tu rohana ala sai olo do ibana mangulahon hajahaton. Diboto do na sala alai ndang berani manghatahon na sintong i ala matanggak mida rupa. Ndang margogo hatana ala dohot ibana mangulahon na jahat i. Asa jotjot do masa parngoluon na maralo parulan tu na hinalomohon ni roha. Ala mangolu di bagasan daging dope. Ala i laos adong do na mangolu di bagasan parngoluon na berani burju di tonga-tonga ni naburju alai di naholip tong ibana marjahat dohot angka parjahat. On ma na nidokna munafik. Laho mangadopi pamingkirion na sisongon on ma hita ingkon sai tongtong marpingkir jala mambahen haputusan di bagasan panuturion ni Tondi Porbadia. Ala Tondi ni Debata do na margogo mangula di bagasan rohanta pasidinghon na jat parohon na denggan. Jala Tondi ni Debata do namangalehon gogo di hita, mamillit manghatahon na sintong dohot mangulahon na denggan
b. Godang do angka naposobulung na madabu tu angka aliran na so manjalo pangajarion taringot tu “hajolmaon” ni Jesus. Didok nasida ndang adong hubungan ni Debata dohot angka na adong di portibi on. Ia Debata nabadia do dungi ia angka na di portibi on termasuk jolma na mardosa do. Asa ndang mungkin ro Debata sian banuaginjang tu portibi on. Sian pangajarion i ma umbahen ndang di jalo nasida pangajarion na mandok Debata gabe jolma (inkarnasi). Molo ro pe Jesus tu portibi on, ndang sintong hadirionNa na ro i ninna nasida. Didok nasida do holan bayang-banyangNa do i ndang Ibana na sasintongna i. Ia na sasintongna sibonsiri ni ajaran nasida i, i ma ajaran ni filsapat na mandok “pamatang on manang benda, i ma penjara ni ide manang jiwa”. Ia poda on poda haliluon do on na boi manegai haporseaon ni angka naposobulung. Anggo haporseaon na tingkos ima Jesus Kristus Anak ni Debata, na gabe jolma ro tu portibion laho manobus dosa ni portibi on.
c. Angka parpoda halilion i pe nunga godang di tongatonga ni ruas ni huria. Deba sian nasida i ma (mantan ruas) na haruar sian huria i. Dipungka nasida do parsoalan, dohot sangkap molo di parbadaan boi ma nasa hata bahenon laho paroaroahon dongan, ninna. Asa mansai jorbut do angka parpoda halilion on. Didok parpoda haliluon i ma muse naung jumpangan tondi nasida. Ai sada sian ajaran parpoda halilion i i ma: boi jolma jumpangan tondi molo nunga lam timbo parbinotoanna. Maralo do i tu ajaran hakristenon, ndang usaha ni jolma umbahen na dilehon Debata TondiNa ro tuportibi on. Ndang usaha ni jolma umbahen na songgop Tondi ni Debata tu jolma dohot tu huriaNa. Alai holan ala ni sangkap ni Debata sambing do i, ala ni holongNa tu jolma dohot portibi on. Songon i do nang Jesus, Anak ni Debata do Ibana na ro sian banuaginjang tu portibi on pola gabe jolma Ibana asa ditanda jolma i Ibana jala langsung dihilala jolma i holong dohot asi ni rohaNa. Ai pola do gabe dosa Ibana na so tumanda dosa, ninna Apostel Paulus.
d. Asa ndang tarsirang ulaon ni Debata sian ulaon ni Anak ni Debata jala ndang tarsirang i sian ulaon ni Tondi ni Debata. Ndang adong tondi na ro so sian Debata. Ndang adong tondi na ro so sian Parsuruon ni Tuhan Jesus. Asa haroro ni Tondi ni Debata do marhatopothon na Jesus Anak ni Debata na gabe jolma. Ingkon porsea do hita di Anak i jala porsea hita naung songgop tondi ni Debata di bagasan dirinta marhite asi ni roha ni Debata. Asa ndang pola be sangsi hita naung jumpangan tondi hita manang ndang. Na pasti dilehon Debata do TondiNa tu saluhut jolma na porsea di Ibana. Alani i olo ma hita ditogihon tondi i. Ai nasa natinogihon ni Tondi ni Debata angka i do anak ni Debata (Rom 8:14)
3. Pokok Diskusi:
1. Songon dia do sikap Naposobulung mangadopi rumang ni parpoda halilion na adong di tongatonganta?
2. Boha do alusta songon naposobulung mangadopi manang maralus dompak parpoda halilion i?
3. Olo do hita angka naposobulung manulak hajahaton nang pe ingkon godang panghorhonna tu bagasan parngoluonta? Taboto do molo di bagasan hajahaton hita godang angka ngolunta on na marisuang na so manggotil agia aha?