PHD

PHD Naposobulung:
Lukas 7:11-17
O Dolidoli, hudok ma tu ho: Hehe ma ho
1. Patujolo:
Turpuk PHD di hita di bagasan tingki on ima sada sian tanda halongangan napinamasa ni Tuhan Jesus tu sahalak dolidoli di huta Nain. Marhitehite tanda halongangan on, naeng porsea sude jolma di hagogoon ni Debata paluahon hita sian hamaolon i. Suang songon i ma nang hita angka na posobulung ni huria asa tongtong porsea tu Debata na tuk mangalehon angka na ringkot di ngoluna. Sandok tahaporseai ma hagogoon ni Tuhan i. Sian tanda halongangan na pinatupa ni Jesus tu sahalak dolidoli di turpuk on dia ma naboi putihanta (mutiha na arga)?
2. Mutiha siputihan:
a. Adong do deba sian angka naposobulung mandok “Dung lam burju ahu na gabe halak Kristen on, lam godang do angka tantangan”, ninna. Memang pandohan i nunga jotjot i dihatahon godang halak, adong do muse na mandok “Dung gabe parhalado natorashu lam godang do hujalo hami tantangan”, ninna. Memang di hata ni Tuhanta i pe dipatuduhon do na ingkon godang adopan ni halak na porsea i angka hamaolon di ngolunta on. Lam jonok hita tu Tuhanta i lam manggogo do sibolis i mangelaela hita asa sega parsaoranta dohot Debata.
b. Alai boi do berengonta di humaliang hita, torop do na manghatindanghon pambahen ni Debata gabe dapotan pasupasu. Lam jonok ibana tu Debata lam tarpasupasu ngoluna. Ingkon parhatopotonta do dung ro pe barita na uli tu tano Batak asa maju halak Batak. Godang ma angka na pistar jala godang ma angka na jumpangan “ampapaga na lomak” di luat pangarantoanna. Jala masa do i nang tu angka naposobulung. Dapotan kerjo, gelar dohot sirongkap ni Tondi.
c. Alani i ingkon sai jumolo ma taparhatopot pangurupion ni Debata mandongani hita, haru pe godang angka parsorionta. Songon pandok ni apostel Paulus “Mandok mauliate do ahu tongtong di Debatangku siala hamu, marningot asi ni roha ni Debata, naung nilehonNa tu hamu di bagasan Kristus Jesus” (1 Kor 1:4). Nang pe taboto do godang angka tantangan di adopi ibana. Ndang sai migor hatop ibana manghatahon parsorionna, alai dihaporseai ibana do i songon dalan ni Debata patulushon angka sangkapNa na denggan i tu portibi on. Ndang mansohot Debata manarihon angka na porsea i, ndang dipasombu mardalan di dalan namaol i. Molo pe godang angka hamaolon na ni adopan ni angka na porsea i, ndang hea ditinggalhon ibana angka naposoNa. Panindangion sisongon i do na ingkon tangkas di angka naposobulung di tingki on.
3. Pokok Diskusi:
1. Songon sahalak naposobulung hita, aha do angka biar, ganggu ni roha na taadopi? Jala boasa olo masa i di hita? Boha do hita mamereng pangurupion ni Debata di bagasan pangalaho sisongon i?
2. Marragam do angka na masa na tabolus di portibi on (masa do i tu angka naposobulung). Isarani , arsak, sahit dohot angka parungkilon sai manosak. Boha do hita laho mangadopi i? Aha do sintaja sipangkeonta tusi?