3.1. Sude do jolma naeng marsiadu mangalului angka na ringkot di ngolu si ganup ari. Ndang mardiaimbar na pogos nang na mora, sude tahe marsiadu laho mangalului ngolu ni pardagingon na lam singkop. Atik pe nian naung godang artana, sinamotna, alai sai marnahurang ne do. Ido umbahen didok di Poda 30 : 15 dua do boru ni linta : nia tuson, nia tuson, tolu do nasida naso habutongan, opat do tahe na so olo mandok nunga sae. Ima manggombarhon ngolu ni jolma na di portibion, paboa ndang hea mandok nunga sae be, alai sai marnahurang do.
3.2. Songoni ma nataida di turpuktaon ima parompuan na mandok tu tuanna : boan hamu tuson asa husobur hami, ninna. Parompuan na so olo manghasabamhon na adong, alai menginginkan asa mamora, berpoya-poya, marhite namanjujui angka tuanna (suami) asa korupsi manang mangalului arta, sinamot, sian dalan na so tingkos pe taho. Alani do dipinsang si Amos nasida dohot tegas didok : tangihon ma hataon, hamu ale lombu sian Basan angka na di dolok ni Samaria, ala memang lombu na di daerah Basan di dolok Samaria mansai mokmok, ala tanoi subur jala mansai lebat angka rumput sipanganonna. Pandohani manggombarhon paboa parompuan na di Samaria uli jala mokmok, alai boi nasida songoni ala dijujui nasida do angka tuanna ( suami ) mangalului sinamot, arta, sian dalan hajahaton pe taho, hape sudenai nunga dosa. Ido umbahen didok: angka na mangarupa halak na pogos jala na papisat-pisat halak na metmet do nasida. Ima ulaon penindasan, halak na metmet, dohot naso mardihadiha dipapisatpisat nasida ala so adong gogona, ndang adong pangalualuanna di portibion. Hape Debata sandiri membela nasida, Debata sandiri berpihak tu nasida. Alani pangalaho nasida i gabe mambahen muruk Debata tu nasida.
3.3. Ndang dihalomohon Debata jolma na jahat, parompuan najahat, alai dihalomohon Debata do parompuan i na gabe ina soripada, ina sitiruon di hata dohot dipambahenan, tarlumobi ma di tongatonga ni keluargana, ingkon gabe tiruan nasida. Alai anggo di turpukon ndang jumpang pangalaho si songon i. Alani pambahenan nasida najahat i ingkon hona uhum ma nasida, ndang adong na boi martabuni sian adopan ni Debata. Ganup na mangula hajahaton ingkon hona uhum ni Debata. Alai dang holan parompuan i hona uhum dohot do tuanna na olo mangulahon hajahaton i. Alani do ingkon manat angka ama sotung mura dielaela angka ina laho mangulahon hajahaton. Tabereng ma si Isebel na mangela si Ahab laho marnampunahon kobun anggur ni si Nabot (1 Raja 21 ; 1-16). Hape sasintongna ingkon ina i do berperan laho mendukung ulaon ni amai asa berhasil, hape baliksa do gabe ina i di jolo mangulahon hajahaton.
3.4.Alani hajahaton ni Parompuan i ingkon hona uhum nasida marhite na saraton ni halak nasida, marhite haithait dohot pinompar nasida marhite hail ni pardengke. Ima manggombarhon uhuman paboa na ro ma malapetaka tu nasida. Ndang dipasombu Debata jolma najahati torus mangulahon hajahaton alai adong do tingki ingkon di uhum jala mansohot mangula hajahaton i dung ro uhuman i. Jala dipatuduhon nasida do muse parsaoran nasida dohot Debata na so tingkos, ai sipaulaula do. Ai na dihalomohon Debata ima: hasintgongan dohot hatigoran (kebenaran dan keadilan) ido na dihalomohon Debata. Ido umbahen didok Debata ; roma hamu tu Betel asa manjahati hamu. Sasintongna di Betel ido tempat peribadatan ni halak Israel. Alai gabe didok Debata tu nasida, asa disi hamu manjahati. Ima pabotohon nangpe diboan nasida pelean situtungon tu Jahowa alai dang dijalo Debata. Ala asing do motivasi nasida laho pasahathon i. Ndang sian panandaon di pasupasu ni Debata najinalo nasida, alai gabe songon na manogok Debata doi dibahen nasida. Asa bebas do do nasida mangulahon dosa. Setiap dipasahat nasida pelean i, nunga dihaporseai nasida sesa dosa nasida, alai marsogotnai muse ulahonon nasida do dosai.
4. Sipahusorhusoron
a. Godang do nuaeng jolma di portibion na so mabiar mangulahon dosa, hape di sada tingki ingkon hona uhum ni Debata do jolma na mangulahon dosa. Nangpe sai diusahahon jolma i martabuni mangulahon dosa i, alai sai na diboto Debata do aha nataula, nang pe holip tahilala (1 Sam 16 : 7 b ). Debata marnida sude angka nataulahon dingoluntaon, ndang adong na buni na so sipapataronNa sogot.
b.Angka ina di tongatonga ni keluarga ingkon gabe tiruan tu angka ianakkonna di hata dohot dipambahenan. Alani ingkon hasabamhononta do napinasahat ni Debata tu hita. Unang sai mangapiani unang tubu hajahaton, alai sai lam hehe ma ngolu partangiangon di sude keluarga ni halak kristen, asa unang mura mandele jumpa masa parungkilon taadopi di ngolunta.
5. Bahan diskusi
a. Aha do na mambahen marsiadu nuaeng jolma mangalului arta portibion ?
b. Songon ina hamu di tonga-tonga ni keluarga, aha do sipatupaonmuna asa jumpang las ni roha (kebahagiaan) di tonga-tonga ni keluarga i ?
c. Boha do pandapotmu taringot tu parompuan na diturpuhon, ima namanjujui tuanna ( suami ) asa mangalului arta sian dalan naso tingkos ?
6. Marende No. 720 : 1-2
7. Tangiang pangondianon
8. Marende No.417 : 1-2
9. Tangiang Panutup : Ale Amanami....
Tidak ada komentar:
Posting Komentar