Khotbah

III Ephipanias 24 Januari 2010

Haholongi ma Tuhan Debatam sian nasa roham dohot sian nasa gogom dohot sian nasa ateatem!
(5 Musa 6:4-9)

Poda dohot hata sipaingot (pidato) ni si Musa do turpuk on tu bangso Israel tagan so sahat nasida tu tano na pinarbagabaga ni Debata ima tano Kanaan. Tagan di pardalanan nang tingki di Misir nunga tangkas nian diajari si Musa bangso i laho manghaporseai Debata Sasadasa i. Alai ndang boi mansohot pangajarion i holan disi, ingkon tong do marudut jala ulakulakhononna muse. Ido umbahen di goari buku 5 Musa on buku Deutronomium manang pengulangan. Pengulangan di angka peristiwa naung hea masa di bangso ni Tuhan i, termasuk pengulangan, pengajaran taringot tu marhaporseon tu Debata.

Nian nunga sai dipatuduhon Debata holong ni rohana tu bangso i, marhitehite na manongos manna, lote, aek gabe hangoluan nasida. Ndang holan i tahe, ditongos petunjuk di pardalanan nasida, naginoaranna tiang api dohot ombun na sumorop. Sudena i dalan ni Debata patuduhon holong ni rohana tu bangso nahinophopna i (teofani).
Alai na umporlu siulahonon ni bangso i ima mangajarhon tu angka sundut na umposo, generasi muda. Ima angka ianakhon di tongatonga ni keluarga. Naeng dohot nasida taruli dipanandaon na tangkas holan tu Debata. Kepercayaan monotheisme, yang mengakui hanya ada satu Allah yaitu Allah Yahwe.
Asa dohot ianakhon marsaulihon haporseaon na polin holan tu Debata naeng ma dipatupa marhite 5 level (tingkatan), dia mai? 5 M:
Parjolo: Mamparateatehon (memperhatikan)
Paduahon: Mangajarhon (mengajarkan)
Patoluhon: Mamaritahon (menceritakan)
Paopathon: Mangarahuthon (mengikatkan)
Palimahon: Manurathon (menuliskan)
Poda na lima on ma na ingkon sipatupaonnasida nang sipatupaonta di tingki on songon bagso ni Debata.
Nuaeng tasungkunma dirinta marsadasada, nunga dilevel piga hita? Tonu sude level nunga taula (mudah-mudahan). Buktina sasi tapangke do tanda silang (horunghorung), marminggu do hita, tatangihon do jamita, tasurathon do hata ni Debata di bagasta. Martangiang do hita. Alai umbalga sian i adong ma sada level/tingkatan na mansai arga. Ima Mangulahon-melakukan (tindakan) natinonahon ni Debata. Sude na level na di ginjang i sisoada do molo so adong pangulahonon. Ido umbahen didok Jesus di Mateus 7:24-27 i (patudos Epistel), na umbege hatangki jala diulahon sipatudoson ma i tu halak na marroha, na paulihon bagasna di atas ni batu mamak, ro pe habahaba ndang dirumpakhon. Alai na manangihon hatangki hape ndang diulahon sipatudoso do i tu halak na so marroha na pajongjong bagasna ni atas ni rihit, dungi mangalantap ma tangkuju, ro ma habahaba diluahon ma bagas i (terjemahan bebas).
Ala ni i do umbahen didok Tuhan Jesus muse: Martua ma na tumangihon hata ni Debata jala naumpeopsa. Amen