Holan hata sipaboangku tu ho do jadi bahenonmu!
Didok sijolojolo tubu ni halak Batak: "Tinallik bulung sihupi, pinarsaong bulung siala, unang sumolsol di pudi nda sipaingot na soada" Atik pe hata ni si jolojolo tubu angka naung mate i, alai arga do di tingkinta sinuaeng on. Ala adong sipaingot, poda na boi mangalehon angka petunjuk tu ngolu na denggan. Pandohan i naeng paingothon hita asa ganup maniop poda, larangan. Ala sipaingot napinodahon ni namarholong ni roha tu hita tujuanna ima asa unang salah mangalangka hita. Asa unang songon nidok ni umpama natuatua: Aek tumuntun lomona maloha gadugadu. Jadi porlu hamanaton.Kehatihatian. Tingki marsiajar di SD iba diajarhon guru tu hami: Sesal dahulu pendapatan, sesal kemudian tidak berguna.Hea do mangaranto sada dolidoli tu Batam, andorang so borhat nunga diorai natorasna,alai sai manggogo do ibana asa borhat. Ujungna borhat ma ibana. Dung dapot 6 bulan mulak ma ibana dibagasan sahit. Unang tatuntun lomonta.
Lomoniroha ni na manghaholongi hita ma
Pangalaho na songon ido na jumpang di si Bileam di turpuk on. Dung dipatunduk bangso israel halak Amori,mangulon ma nasida di Moab andorang sobongot tu tano Kanaan. Ala naung ditaluhon Israel Amori, mabiar si Balas Raja Moab, disuru ma suruanna manjou si Bileam mamurai halak Israel. Ia si Bileam ima sahalak na porsea tu Debata, dipatuduhon ibana do paboa ibana naung porsea tu Debata. Alai disuru ibana Raja Balas mangela bangso Israel tu debata si Leban. Ai Bileam lapatanna Pangela, penggoda. Ise olo mangeleela donganna tu dalan na so denggan, si Bileam ma i.
Songon i do hape ngoluon muramura do hita terpengaruh. Atik pe naung tardok porsea si Bileam alai ndang olo disipaingot ni Debata. Tona ni Debata tu ibana: holan hata sipaboangku tu ho do na jadi bahenonmu. Diboto Debata do roha ni si Bileam ala naung disogok raja Moab do ibana,manjalo sisip, suap.
Alani i tarrimas ma Debata, disuru ma suruanna mangambati ibana, hape ndang diboto ibana na jongjong surusuruan i. Pola sampe marimas ibana tu halodena i (ay 32)Alai ujungna sadar ma si Bileam na manuntun lomo do hape ibana. Didok ibana ma tu surusuruan i: Nunga mardosa ahu ayt 34. Dungi ro ma hata ni Jahowa marhite surusuruan i: mardalan ma ho udur dohot angka bawai...bertobatlah...
Hamu angka dongan nahinaholongan di bagasan goar ni Tuhan Jesus Kristus, seganai molo jumpang dope pangalaho ni halak Kristen songon pangalaho ni si Bileam on? Segana i parsaoran ditongatonga ni bagas molo jumpang songon pangalaho ni si Bileam on? Alani i tung sipasidingon do pangalaho sisongon i, atehe. Dipangido Debata sian hita, asa
Parjolo: Marroha naiasma hita. Di Mateus 5:8 "Martua ma parroha na ias, ai idaon nasida do Debata. Naeng sintong rohanta be unang margellokgellok. Ai Diboto Debata do sude aha na di rohanta. Unang taloas Debata tarrimas. Unang sanga halode (angka natinompa ni Debata) manghatai tu hita ala ni jogal ni rohanta. Patudos tu BE No 68:3
Paduahon: Unang muramura hita terpengaruh di zaman on: Nuaeng muramura do jolma tarela asa dapotan sian na so dalanna. Porsea tu peramal, datu, Fengsui. Molo tabereng di angka na masa nuaeng, beredar do di HPta marhite sms: ingin dapat jodoh: ketik REG SPASI kirim ke...ingin dapat kerja ketik REG Spasi kirim ke...ingin dapat INOVA ketik REG spasi... dohot angka tawaran-tawaran na asing. Gabe lupa jolma i di kedaulatan ni Debata. Lupa jolma i na marhuaso do Debata patupa halongangan laho patupahon Mujijat. MUJIJAT ITU NYATA. Didok hata ni Tuhanta di Mat 7:7 Pangido hamu ma....
Patoluhon: Patar do saluhut di adopan ni Debata. Unang ma martabuni hita ai diboto Debata do aha na di rohanta, sangkapta dohot pingkiranta. Diboto Debata do maksud jahat ni si Bileam. Dilehon Debata do tu hita nanidokna sunaidesis, kata hati, suara hati, taoloi ma i ai sian Debata do i. Taboto do na tingkos i siulahononhon,na sala i sipasidingon. Unang ma sala mamangke hita di silehonlehon ni Debata asa unang tarrimas Debata. Amen.
Tidak ada komentar:
Posting Komentar