Ingkon Jahowa do sioloanta!
I. Patujolo.
Ia turpuk on ima sada dialog ni si Josua dohot bangso Israel, di na pinapunguna nasida di Sikem sahali. Dung sahat bangso Israel taripar sian batang aek Jordan, dipaluhut si Josua ma sude marga ni Israel tu Sikem, jala dipio angka sintua ni Israel, angka indukna, angka panguhum dohot angka juara tulis, jala dipatindang di jolona. Asa naeng tangkas jolo sulingkitanna roha ni bangsoi manang na marsihohot do rohanasida mangoloi Debata manang na muba do roha nasida dungkon sahat nasida tu tano pinarbagabaga i. Ala diboto ibana do songon dia hatangkangon ni roha ni bangso i, na mura marungutungut jala mura mubauba. Hape kondisi dohot situasi di Kanaan nunga andul marasing martimbanghon saleleng nasida di pardalanan parhorsihan leleng ni 40 taon i. Natangkas ima diparhorsihan bangso na nomaden (marpindapinda) do nasida alai ia dung di Kanan nunga bangso na menetap jala dao dumenggan parngoluonnasida (peradapan). Di Kanan i nasida nunga dapotan tano, dohot huta bahen inganan parmianan. Mangan nasida sian porlak anggur dohot hau jetun (Jos. 24:13). Kondisi inganan na dao dumenggan jala na maduma i boi mambahen nasida talpe tu na manadinghon Debata Jahowa na sinomba nasida nasaleleng on. Ima Jahowa, Debata ni ompunasida si Abraham, Isak dohot Jakob. Dalan laho padasiphon pangokuon ni bangso i do umbahen na dipapungu si Josua angka marga ni bangso i, asa sai marsihohot mangoloi Debata Jahowa. Unang marbalik nasida tu debata ni halak Amori i manang tu debata ni ompunasida di bariba ni Efrat dohot hatiha di Mesir diparhatoban.
II. Hatorangan.
Ayat. 15. Mansai bisuk do si Josua laho mamereng bagas tu roha ni bangso i taringot tu hasatiaon na marsihohot sian bangso i tu Debata. Na hinalomohonna ima haputusan na tang jala na haruar sain roha parbagasan. Tontu do mamolus proses pamingkirion asa sahat tu haputusan na tang si songon i. Parjolo didok ibana do “pillit hamu ma sadarion manang ise naeng oloanmuna”. Nanidokna di si ima; tu ise nasida mangoloi (Indonesia: beribadah). Molo pe didok di son pillit namarlapatan do i paboa ndang bangso i mamillit Debata alai Debata do mamillit bangsoi. Ima marhite angka na binahen ni Debata tu nasida naung jumolo di patorang si Josua di jolo ni turpuk on (Jos. 24:1-13). Asa molo didok pe “mamillit” namarlapan doi asa ditontuhon tu ise nasida mangoloi (beribadah). Ndang dihalomohon rohana haputusan na holan satongkin, manang haputusan sian roha na tomputompu (emosional) alai naeng ma marhite sian pergumulan. Lapatanna naeng marhite sian angka naung nihilala, binege dohot niida ni bangso i, taringot tu angka na binahen ni Debata tu nasida. Molo dung songon i gabe parbue ni hamauliateon (rasa syukur) ma pangoloion (ibadah) i tu Debata na mangelehon tu diri ni jolma ragam ni angka na dumenggan i. Sian hata ni Debata na binoto, nihilala, jala binege ni si Josua do nahinatahonna tu bangso i. Parbue ni haporseaonna do dihatahon (Jos. 24:2), jala marhite panandaionna na tangkas dompak Jahowa ibana mandok “alai anggo ahu dohot donganhu sajabu, ingkon Jahowa do oloannami”. Sada pernyataan na mansai denggan sian sahalak partogi molo boi ibana parjolo mambahen sikap na denggan. Nagabe tudosan nauli, sikap sitiruon do dilehon. Asa ndang masalah suara terbanyak laho mangoloi Jahowa alai panandaon dohot pangoloion natangkas do. Lapatanna ndang dipaima alus sian natorop i taringot tu Debata na gabe sioloannasida.
Ayat 16-18. Marhite sian panandaon nasida tu Debata Jahowa; na manogihon nasida dohot ompu nasida ruar sian tano Misir, namangalehon tanda angka na bolon, huhut na mangaramoti di sandok dalan nabinolus nasida, jala na namangonjar saluhut halak Amori (ayat 17-18). Umbahen na mampu margogo nasida mandok: “Dao ma i sian hami, anggo tung manadinghon Jahowa laho mangoloi angka debata sileban”.
Ayat 19-20. Dipaingot si Josua do nasida asa ndang na muramura laho manghatahon haoloon laho mangoloi Debata. Ala na badia do Debata jala pangiburu, ndang haoloan jolma ibana molo so sian haoloon nabotulbotul. Dungi parrimas do Ibana maradophon angka namarsineang digoarNa, lapatanna namuramura mandok mangoloi Debata hape laos muramura laho mansoadahon muse hona uhumNa do. Didok si Josua songon i ndada na mambiarbiari bangsoi ibana, alai na naeng pataridahononna ima mansai mura do bangso i mandok mangoloi alai laos mura do nasida marungutungut laho marbalik dompak debata na leban saleleng nasida di pardalanan i. Jala mansai mura do nasida muse tartait laho manomba debata baal ni halak Kanani na andul ummura oloan (ala ndang manuntut hadaulaton natangkas). Hape ia Debata Jahowa, ima Debata na gok uhum do ndang boi marlomolomo jolma i di adopanNa. Jala muse boni ni haporseaon tu debata kafir i nunga adong lohot di nasida. Marningot nasida sada bangso na bolon naung mamereng jala godang marsaor dohot angka bangso na manomba debata kafir. (pat. Ayat 23 namandok “debata sileban angka na ditonga-tongamuna i”).
Ayat 21. Dialusi bangso i do pandohan ni si Josua namanulingkit sahat tu roha nasida. Didok nasida “sitongka ma anggoi, ingkon Jahowa do naeng oloannami”. Pandohan on ma sada pandohan namansai arga jala tegas sian nasida paboa holan tu Debata sasadasa nasida porsea. Tontu do pandohan i tubu jala haruar sian proses pergumulan sian mulai sungkunsungkun ni Josua naparjolo i. Asa dapot ma narumingkot sian panindangion nasida na holan manomba Debata Jahowa nasida. Ndada holan marnida na binaen ni Debata tu nasida dohot tu ompu nasida, ndada ala ni murana laho manghatahon, jala ndada ala ni biar nasida maradophon uhum ala nabadia jala pangiburu Debata, alai nunga alani haporseaonnasida tu Debata.
Ayat 22-23. Sada hata laho pagomoshon (menguatkan) sian naposo ni Debata tu bangso i, na so pola ringkot angka sitindangi alai laos nasida na marpadan i ma sitindangi di panindangion i paboa naung rade nasida mangoloi Debata na hinaporseaannasida. Hata laho mamomosi panindangion i ima asa rade nasida paholang debata silaban na ditongatonga nasida jala rade paunduk roha tu Debata Jahowa.
Ayat 24. Laho mangolophon hata ni Si Josuai dohot mangolophon parpadanan i didok bangso i ma “Jahowa Debatanta i do naeng oloannami jala hataNa i naeng tangihononnami”
III. Sipahusorhusoron
1. Porlu do patupaon ni naposo ni Debata parmahanion tu angka ruas ni huria. Marhite parmahanion i ma botoonna hatoguon ni haporseaon ni angka ruas ni huria marsadasada dohot halembaon ni ruas i di sisi naasing. Alai parmahanion marhite dialog langsung dohot naso langsung ala baoi do i laos pajamothon, patoguhon dohot pahothon roha ni ruas i marsadasada asa lam tangkas manghaporseai Debata na tahaporseai i. Ala na mansai godang do angka debata naleban naboi mangarosak haporseaon ni ruas dipartingkian sinuaeng on. Adong do i debata huaso, debata hepeng, dohot debata nihagiot (nafsu duniawi) d.a.n. Sada nanaeng ingkon momos di parngoluon ni halak naporsea ima; ingkon sai tongtong patupa partangiangan (harian, mingguan, bulanan dohot angka tahunan, d.a.n.) songon wujud ni pangoloion tu Debata. Asa molo sai taula ngolu na martangiang i sai hot ma hita di natahaporseai i. Alai molo gale do hita dipartangiangon i, olo ma lalolalo pamerengta di angka nabinahen ni Debata tu hita gabe mura hita maninggalhon Ibana. Ai mansai gogo do huaso ni portibion marhite namambahen “sistim” dohot “paraturan perundang-undangan” laho manait hita asa holang sian Debata. Alai marhite na sai tapasomalsomal dirinta mangoloi manang “marhadaulaton” tu Debata gabe pahoton ni Tondi i ma hita marhaposeaon tu Jesus Kristus Tuhanta i.
2. Gomos ma tatiop haporseaonta tu Debata. Unang ma huta mura tarela tu angka huaso naadong di portibion. Ai parsatongkinan do i. Alai anggo huaso ni Tuhan Debata, na hot do i ro di salelengnilelengna. Jala pasahatonna do i tu angka na ”satia” tu Ibana. Molo pos rohanta tu Debata, ndang tarbahen liluhonon ni portibion hita.
3. Ala ni i do ganup halak Kristen naeng tongtong mandok: ” Alai anggo ahu dohot donganku sajabu, ingkon Jahowa do oloannami. Sada ”komitmen” ni haporseaon do i na so boi ditawartawar manang ise. Asa martua ma jolma na mambahen Jahowa haposanna. Songon na didok di hata ni Endeta i: Martua do na marhaposan tu Debata amanta i..... ndang rihit haojahan i, na manghaposi Tuhan i. Amen
Tidak ada komentar:
Posting Komentar