Jamita

Jamita Minggu Okuli, 7 Maret 2010
Gokhon ma Jesus tu Pestami
Joh.2:1-10
Di sada pandohan ni halak Batak didok do songon on: Gokhon do sipaimaon, joujou sialusan. Pandohan on martudutudu tu hinaarga ni sada undangan laho mandohoti sadasada ulaon. Maila do iba molo ri tu sada ulaon hape ndang adong di iba undangan sian napatupa ulaon i. Alai sabalikna molo adong do undangan tu iba tontu gohan do i jala patupaon do natuk sipatupaon. Isarani pasahat tumpak, amplop, tangiang, poda nang angka partisipasi na asing. Pangalaho sisongoni do na taida di turpuk jamita sadari on. Haroro ni Jesus tu pesta unjuk na di huta Kana i hinorhon ni undangan ni hasuhuton bolon. Alai ndada holan ro boti Tuhan Jesus. Lobi sian nahinirim ni hasuhuton i dipatupa ibana tanda halongangabn di pesta i. Hinorhon ni hurangan anggur di pesta i dipatupa Jesus ma tanda asi ni roha tu saluhut na ro tu ulaion i. Nda sihalashonon do sisongon i?
Antong tagokhon ma Jesus tu nasa ulaonta asa marlas ni roha hita sian asi ni roha ni Debata. Ai marpanatap do Debata tu nasa ngolunta on. Laos ido goar ni Minggunta sadari on. OKULI.