Jamita Minggu Palmarum, 28 Maret 2010
Na uli do na binahennan i tu Ahu
Markus 14:3-9
1. Dimiahi sahalak parompuan (Marta) Tuhan Jesus di bagas ni si Simon sahalak na huliton. Ido jamita di hita di Minggu palmarum sadarion. Mamiahi ido sada adat dohot hasomalan na masa di halak Jahudi tu sahalak na marsangap dohot marsahala. Digombarhon pamiahion i do holong ni roha na so marsipaulaula jala pengorbanan na luar biasa sian si Maria tu diri ni Tuhan Jesus. Pamiahion i patuduhon holong ni roha, kepedulian "solidaritas" tu Tuhan Jesus sian parompuan i apalagi dung diboto ibana nanaeng marsitaonon ma Jesus hombar tu naung pinabotohon ni Tuhan Jesus tu nasida di angka tingki na salpu.
2. Alai na umbalga sian i idaonta ma pamiahion i ima hataridaan pamongotion tu ngolu ni Jesus na sasintongna. Ia Jesus i ndada holan di tingki las ni roha, alai dohot do di sitaononna. Jesus naung rap dohot nasida na saleleng on ingkon sahat ma tu hamamatena.
3. Alai balik sian i do pangalaho ni sahalak sian na di jabu ni si Simon i, marungutungut ibana ala pamiahion na pinamasa ni parompuan tu diri ni Jesus. Marungutungut ido sada tindakan na so boi antusan. Marungutungut ido sada bahasa na so boi surathonon. Molo adong sasahalak marungutungut tung so binoto do jiwana, na setuju manang ndaong. Sandok ingkon ibana do umboto na naniungtunguthonna i. Ido umbahen didok na marungutungut i, marisuang nai miak na angur i, aut di gadis miak i nunga bao pasahaton tu angka na pogos. Nda holan alasan do i? Alasan na so mansuk akal, nda holan ala na so lomo rohana jala haboratan ibana dipamiahion ni parompuan i maradophon Tuhan Jesus. Aut sura didok tu ibana, beta, adong disan napogos na ingkon asian, ra dohononna do, hamu ma jo lao tusi, adong ulaonku, ndang sanga ahu. marsidalian ma ibana.
4. Dijalao Jesus do silehonlehon/pamiahion ni parompuan i, tarida do i sian alus ni Jesus: " Nauli do nabinahenna i tu Ahu....
5. Huria ni Tuhanta nahinaholongan di bagasan goar ni Tuhan Jesus Kristus, dia ma na boi putihanta sian jamita sadarion, domu tu pamiahion ni sahalak parompuan i tu Jesus? Tauji ma jolo manigatisa. Na pasti di bagasan dua pangalaho na di turpuk on do nuaeng hajongjongan ni ngolunta. sada mai sipatupaonta jala sada sipasidingon.
Parjolo: Memang maol do jumpang manang bertahan angka dongan na boi tangkas mangantusi aha na masa di ngolunta. Godangan do jolma mamereng aha na adong di hita. Godangan do jolma mamereng hita di bagasan keberhasilanta i, di bagasan haadongonta i. Molo tingki mamora hita di si do hita dibereng halak. Uju marpangkat hita disi do hita di bereng halak. Alai ndung marsitaonon manang gale hita, marpogos, tingki ndang adong hepeng. Jarang do na olo mangurupi hita pinomat holan mandulo. Bangko do i huroha.
Paduahon: Molo dipasahat parompuan i miak na angur jala na arga tu Tuhan Jesus, aha ma na boi pasahatonta tu Ibana. Aha do miak na angur sipasahatonta tu Tuhan i? Molo tajaha di Rom 12:1, didok pelehon hamu ma dagingmuna gabe pelean na badia. Antong peleanta tu Debata ima pamatangta dohot dagingta on. Boasa? 1 Korint 3:16 didok apostel Paulus do : "ndang dioboto hamu joro ni Denata do pamatangmuna i? Molo didok joro ni Debata ima parmianan ni Debata. Asa di bagasan ngolunta on ma Debata maringan. Tanda ni hamauliateon ni rohanta tu Debata marningot asi ni rohana tapelehon ma ngolunta tu Ibana. Unang ma hita marungutungut. Ai molo sai mian di hita ungutungut bararti ndang taboto mananda asi ni roha ni Debata. Pasiding diri sian ungutungut do do arga ni i dohot na manghaholongi Debata nang jolma. Minggu palmarum paingothon hita do i dipambahenan ni Debata. Marpalmarum ma hita tanda ni pangauhononta di panghophopon ni Debata mnarhite Jesus.
Patuluhon: Sai adong do angka reherehe tu ulaon na denggan na tapatupa. Ndang sude halak manghalomohon molo taula na denggan. Alai nang pe godang angka hamaolon ta adopi laho patupahon na denggan i, ndada gabe mansohot hita hinorhon ni i.Sandok ingkon datdatanta do mambahen na denggan, unang marna loja hita patupahon na denggan. Ai ndang jolma na menilai na tabahen i alai Debata sandiri do. Debata do na mamereng aha na denggan natapatupa laos sian Ibana do ro singkat ni na tabahen i. sandok ulahon ma na denggan binsan mangolu hita. Amen.
28 Maret 2010
Jamita
Langganan:
Posting Komentar (Atom)
Tidak ada komentar:
Posting Komentar