Kesehatan

HKBP Distrik XVI Humbang Habinsaran patupa pangubation tu angka natuatua

Na di ari Selasa 13 April 2010 na salpu i dipatupa HKBP Distrik XVI Humbang Habinsaran do pangubation (pengobatan gratis) tu angka na tuatua na adong di distrik i. Dipatupa do ulaon i di gareja HKBP Sabungan Ressort Siborong-borong Tapanuli Utara Torop do ro di ulaon on pola do saratus lima pulu halak ama dohot ina natuatua na adong di distrik i. Andorang so dipatupa pangubation i jumolo do dibohali marhite partangiangan nihobasan ni inanta Pdt. Debora Sinaga, MTh Praeses ni Distrik rap dohot MPSD. Torop do nang angka pangula na gok tingki di ulaon on na ro sian angka ganup resort dohot huria ala laos tongon do marsermon distrik ganup ari Selasa. Diondolhon inang Praeses do di jamitana hinaringkot ni hahipason di angka natuatua. Atik pe naung matua pamatang on dihalomohon Debata do asa tongtong hipason laho mamuji Ibana. Laho patupahon pangobation i diundang Distrik ma dua halak dokter ima dr. Basaria M. Lumban Gaol, M.Kes dohot dr. Damanik sian RSU Swadana Tarutung. Laos dipatorang amanta dohot intanta dokter i do tu angka natuatua na marpungu i asa tongtong ringgas mamareso sahitna tu dokter manang parubat na jonok. Boasa? Didok nasida molo angka natuatua muramura nama disonggopi sahit hinorhon ni umur naung lam tu sundutna jala ala nina loja na sailaon.
Jala dung simpul ulaon i laos dipatupa do nang pabangkithon parhobas ni angka natuatua di Distrik i. Dalan laho marpungu dohot mangalehon angka informasi na ringkot sibotoon nasida.
Hombar tu pandok ni Diakones Sri Dewi br. Lubis na tongon mangula di distrik i , tu tingki nanaeng ro patupaon nasida ma parpunguan dohot partangiangan tu angka natuatua pinomat sahali sabulan nihobasan ni angka pangula na di distrik i.
Tung mansai las do roha ni sude angka natuatua na umbege barita i ala dietong nasida boi do i pajonokhon nasida tu Debata. Atik pe naung matua pamatangnasida alai dihirim nasida do haradeon ni parhalado laho mangajari nasida di hata ni Debata.
Gabe tiruan ma tutu na pinatupa ni Distrik on dalan pahembanghon angka pangkobasion na lam tu dasipna di tongatonga ni hurianta HKBP.