Jamita

Minggu VIII dung Trinitatis 25 Juli 2010

Tanda ma asi ni roha ni Tuhan i
(1 Timoteus 6:17-19)
Pdt. Pahala Jannen Simanjuntak

Hamu angka dongan nahinaholongan di bagasan goar ni Tuhanta Jesus Kristus!
Tangkas do dipaingot apostel Paulus si Timoteus asa manjamitahon hata ni Debata tu angka na mora di tongatonga ni huria i.
Molo tauji manigati jamita i idaonta ma tolu mutiha na arga di bagasanna. Dia mai?
Parjolo: Unang dihanginjanghon hamoraonna. Tung sada pangalaho sipasidingon do tahe pangalaho on. Ai molo sai mian dope ginjang ni roha di sasahalak molo adong di ibana sinamot manang arta ndang adong na marlomo ni roha tusi. Ndang mangolu disi holong ni roha. Holan dirina do dietong ringkot. Ndang olo i menghargai halak na asing.
Paduahon: Ngolu namarasiroha. Didok Tuhan Jesus do di Luk 6:36 "gabe parasiroha ma hamu songon amamuna parasiroha i. Molo adong di hita angka sinamot dohot silehonlehon ni Debata naeng do lehononta sasaotik tu angka na pogos namangharingkothon. Nuaeng on mansai maol nama jumpang di ngolu ni deba halak ngolu na marasiroha (solidaritas). Atik pe adong na diibana dilehon Tuhan i. Nunga lalap jolma i holan na mamingkiri ngoluna sandiri. Ndang parsoalan manang songon dia na masa tu donganna. Di tongatonga ni ngoluntaon naeng ma masiurupan hita songon angka anak ni Debata
Patoluhon: Mangolu di bagasan parange habadiaon. Nian ndang holan tu angka namora dipaingot ngolu na marhabdiaon. Alai tu sude jolma na di hasiangan on naeng jumpang pangalaho angka na denggan. Holong ni roha na sian Tuhan i. Tangkas do dipaingot si Timotes halak na mora di turpuk on asa diingot tongtong laho mangulahon na denggan. Lapatanna mamangke hamoraon i ingkon do tong di bagasan ruhut-ruhut na denggan. Boi do adong na mora na so terarah be ngoluna, isarani mabuk-mabukan, hidup berpoya-poya dohot na mansuasaehon naniomona. Malo ma nian angka parsinamot laho ma"manage" sinamotnai asa hombar tu lomo ni roha ni Debata.

Antong tu hita saluhutna, na mora, nanaeng mamora dohot angka naung hea mamora taingot ma poda ni apostel Paulus marhite si Timoteus on. Asa tanda hita songon siihuthon Tuhan i. Asa manang aha pe na adong di hita, baik hamoraon, hagabeon dohot hasangapon i unang ma taparsigantung. Tutu ringkot do hamoraon, hasangapon dohot hagabeon songon nidok ni halak Batak i. Alai boha ma bahenonta i asa sai tongtong gabe pujipujian tu Debata. Unang ma talului hamoraon i dohot angka cara-cara na so sian dalanna, tarlumobi maralo tu hata ni Debata. Didok Tuhan Jesus di Mat 6:33
: "Sai jumolo ma lului hamu harajaon ni Debata dohot hasintonganna dungi tambahononna ma angka ondeng tu hamu" Unang lalap di angka portibion. Amen